Ди Мария Манчестер Юнайтеддаги даврни даҳшат деб атади
Аргентина ҳужумчиси Анхел ди Мария футбол оламида иқтидорли ўйинчи сифатида танилган бўлса-да, фаолиятининг айрим босқичларида унинг имкониятлари етарлича қадрланмаган. Футболчи "Манчестер Юнайтед"даги даврини эслар экан, Луи ван Гал қўл остида ўйнаш унинг учун жуда оғир кечганини айтди. Бу ҳақда euro-football.ru хабар беради.
Ди Мариянинг таъкидлашича, у голлар уриб, жамоадошларига ассистлар ҳам бериб турган, бироқ ван Гал уни деярли мақтамаган. Мураббий асосан футболчининг хатоларини муҳокама қилган, бир ўйинда бир мартасидан кўп хатоға йўл қўйилса, учрашувни омадсиз деб баҳолаган. Ди Мариянинг сўзларига кўра, бундай муносабат охир-оқибат унинг ўзига бўлган ишончини пасайтирган.
Ҳозир ди Мария Аргентина чемпионатида тўп сурмоқда. 2022 йилда жаҳон чемпиони бўлгани эса, футболчининг ўзига ишончини қайта тиклашига катта туртки бергани тахмин қилинади.