Инфантино Престианига Винисиус билан эпизодда қизил бериш керак эди дейди
FIFA президенти Жанни Инфантино майдондаги баҳслар пайтида рақибига нимадир деяётганда оғзини бекитадиган футболчиларни қатъий жазолаш тарафдори эканини билдирди. Унинг фикрича, бундай ҳолатлар қизил карточкага сабаб бўлиши керак. Бу ҳақда euro-football.ru хабар беради.
Европа Чемпионлар лигасидаги сўнгги учрашувлардан бирида «Бенфика» вингери Жанлука Престиани «Реал» футболчиси Винисиус Жуниорга гапираётганда оғзини футболкаси билан ёпиб олган. Шундан сўнг бразилиялик футболчи ҳакамга рақиб томондан ирқчилик ҳақоратлари янграганини айтиб шикоят қилган.
Инфантинонинг таъкидлашича, агар футболчи оғзини беркитиб гапирса ва кейин у ирқчиликда айбланса, бу вазиятда қизил карточка кўрсатиш лозим. У бу ерда масала ҳақорат бўлган-бўлмаганида эмас, оддий мантиқда эканини урғулади: ҳақоратли гап бўлмаса, нега оғизни яшириш керак.
Икки ўйин натижасига кўра «Реал» «Бенфика»ни 3:1 ҳисобида мағлуб этиб, кейинги босқичга йўл олди.