Таиланддаги бокс турнирида ёшларимиз учта ёрқин ғалаба қозонди
Таиланднинг пойтахти Бангкок шаҳри айни кунларда бокс бўйича ёшлар ўртасида ўтказилаётган нуфузли Futures Cup халқаро турнирига мезбонлик қилмоқда. Ушбу йирик спорт мусобақасида дунёнинг кўплаб мамлакатларидан келган умидли чарм қўлқоп усталари ўзаро куч синашмоқда. Эътиборли жиҳати шундаки, мазкур халқаро турнирда Ўзбекистон шарафини бирданига иккита терма жамоамиз аъзолари ҳимоя қилмоқда. Ёш боксчиларимиз халқаро майдондаги тажрибаларини ошириш ва келажакдаги йирик мусобақаларга тайёргарлик кўриш мақсадида ушбу турнирга жиддий ҳозирлик кўриб келишган.
Мусобақанинг иккинчи кун дастуридан Ўзбекистон терма жамоасининг 4 нафар истеъдодли вакили иштирокидаги қизиқарли жанглар ўрин олган эди. Дастлабки жанг қизлар ўртасида 57 килограмм вазн тоифасида бўлиб ўтди. Унда ҳамюртимиз Фарзуна Рўзиева ҳиндистонлик кучли рақиба Лонгжам Радҳамани билан рингга кўтарилди. Кескин ва муросасиз кечган баҳсда вакиламиз бор маҳоратини ишга солган бўлса да, якунда тажрибалироқ рақибасига имкониятни бой бериб қўйди. Шунга қарамай, бу жанг ёш спортчимиз учун келажакдаги ғалабалар сари муҳим тажриба мактаби бўлиб хизмат қилиши шубҳасиз.
Йигитлар ўртасидаги баҳслар эса мухлисларга ҳақиқий қувонч бахш этди. Хусусан, 55 килограмм вазн тоифасида рингга чиққан Бекзод Исмоилжонов сенегаллик боксчи Салл Моуҳамедга қарши ажойиб жанг ўтказди. Ҳамюртимиз биринчи раундданоқ ташаббусни ўз қўлига олди ва рақибига кучли зарбалар йўллашни бошлади. Унинг устунлиги иккинчи раундда ўзининг ёрқин ифодасини топди ва Бекзод рақибини техник нокаут евазига мағлубиятга учратиб, навбатдаги босқич йўлланмасини нақд қилди.
Яна бир ишончли ғалабани 60 килограмм вазн тоифасида юртимиз шарафини ҳимоя қилаётган Бобомурод Боймирзаев қўлга киритди. У Хитой Тайпейи вакили Сун Жао Тинг билан куч синашди. Жанг давомида ўзбек бокс мактабининг ёрқин анъаналарини намойиш этган Бобомурод учинчи раундга келиб рақибининг қаршилигини бутунлай синдиришга муваффақ бўлди. Ҳакамлар ушбу жангни муддатидан олдин тўхтатишга қарор қилишди ва ҳамюртимиз техник нокаут эвазига ғолиб деб топилди.
Куннинг сўнгги жанги 65 килограмм вазн тоифасида ўтказилди ва унда Иброҳим Шокиржонов хитойлик Абудужиели Кадиердинг билан рўбарў келди. Ушбу қарама қаршилик тўлиқ уч раунд давом этди. Иброҳим бутун жанг давомида ўзининг техник ва тактик устунлигини намойиш этиб, рақибига ҳеч қандай имконият қолдирмади. Якунда ҳакамлар бир овоздан 5:0 ҳисобида ўзбекистонлик боксчининг ғалабасини қайд этишди. Ўзбекистон бокс федерацияси матбуот хизмати берган маълумотларга кўра, ёшларимизнинг турнирдаги иштироки муваффақияятли давом этмоқда ва олдинда бизни яна кўплаб қизиқарли жанглар кутиб турибди.