"Бавария" икки қизил карточка билан "Байер"га қарши дуранг ўйнади

Германия Бундеслигасининг 26-туридан ўрин олган марказий баҳслардан бири «Байер» ва «Бавария» жамоалари ўртасида бўлиб ўтди. Қизиқарли ва кескин курашларга бой кечган ушбу учрашув якунида томонлар 1:1 ҳисобида дурангга имзо чекишди.

Турнир жадвалида пешқадамликни сақлаб турган «Бавария» (67 очко, 1-ўрин) меҳмон сифатида майдонга тушди. «Байер» эса 45 очко билан 6-поғонада жойлашган ҳолда рақибини қабул қилди. Баҳснинг илк дақиқалариданоқ майдонда шиддатли ўйин кузатилди.

Ҳисоб 6-дақиқада очилди. Майдон эгалари сафида Гарсия аниқ зарба билан тўпни дарвоза тўрига жойлаб, жамоасини олдинга олиб чиқди. Биринчи бўлимда меҳмонлар учун яна бир нохуш ҳолат юз берди — Жексон 42-дақиқада қоидабузарлик сабаб майдондан четлатилди ва «Бавария» бир киши кам бўлиб қолди.

Шунга қарамай, мюнхенликлар иккинчи бўлимда курашни давом эттирди. 69-дақиқада Луис Диас ҳисобни тенглаштириб, жамоасига муҳим голни тақдим этди. Бироқ учрашувнинг сўнгги қисмида меҳмонлар яна бир зарба қабул қилди — Диас 84-дақиқада иккинчи сариқ карточкадан кейин майдонни тарк этди. Шу тариқа «Бавария» ўйинни 9 нафар футболчи билан якунлашга мажбур бўлди.

Шунга қарамай, Венсан Компани бошчилигидаги жамоа ҳисобни сақлаб қолишга муваффақ бўлди ва сафардан муҳим бир очко билан қайтди. Бу натижа турнир жадвалидаги курашни янада қизиқарли қилиши кутилмоқда.

Бундеслига. 26-тур
Байер — Бавария 1:1
Голлар: Гарсия 6 — Луис Диас 69.

"Байер": Бласвиҳ, Куанса, Андриҳ, Тапсоба, Кулбрайт (Ҳофман, 79), Фернандес, Гарсия (Паласиос, 77), Поку (Телла, 87), Терриер (Маза, 46), Тилман, Шик (Кофане, 61).

"Бавария": Улрайх, Станишич, Упамекано, Та, Лаймер, Киммих, Павлович (Горецка, 61), Олисе (Бишоф, 89), Карл (Кейн, 61), Луис Диас, Жексон.

Четлатиш: Жексон 42, Луис Диас 84.