«Սանիթեք» ընկերությունը սկսել է մտածել երկրորդ օպերատորի մասին, շատ կարևոր է, որ կխուսափենք դատական գործընթացից. Հայկ Մարության

Մենք մնում ենք այն համոզմունքին, որ Երևան քաղաքը պետք է առնվազն 2 օպերատոր ունենա. այս մասին այսօր Երևանի ավագանու արտահերթ նիստից հետո լրագրողների հետ զրույցում ասաց քաղաքապետ Հայկ Մարությանը:

«Այսօր մենք ունենք «Սանիթեք» ընկերություն, որը շատ վատ վիճակում է, ունի մեքենաների պակաս»,-ասաց քաղաքապետը:

Ըստ նրա՝ իրենք 10-ից ավելի անգամ հանդիպել են ընկերության տնօրինության հետ և ամեն անգամ խիստ զգուշացրել են: «Մեղավոր է «Սանիթեք» ընկերությունը, բայց մեղավոր են նաև նախկին իշխանությունները, որ թույլ են տվել մեկ ընկերության: Առաջին իսկ օրվանից ես իրենց ասել եմ երկրորդ օպերատորի մասին, բայց այս ընկերությունը չի ուզում, որ երկրորդ օպերատոր մտնի դաշտ»,-ասաց նա:

Հայկ Մարությանը նշեց, որ պայմանագիրը 12 տարով է կնքված: «Եթե մենք սկսենք կտրուկ գործողություններ անել, անհնար է դատական պրոցեսից խուսափել: Մենք գնում ենք միակ ճանապարհով, որը մեզ թույլ է տալիս ունենալ մաքուր Երևան: Ես չեմ ուզում շատ չակերտներ բացել, որովհետև դա կխանգարի բանակցային պրոցեսին: Ի վերջո մենք հասել ենք այնտեղ, որ ընկերությունը սկսել է մտածել երկրորդ օպերատորի մասին: Սա շատ կարևոր է, որ մենք կխուսափենք դատական գործընթացից»,-նշեց նա: