Չինաստանում տղամարդու երեք սիրուհիներն իմացել են իրար մասին ու նրան հանձնել ոստիկանությանը
Չինաստանի Գուանսի Չժուան ինքնավար շրջանում երեք աղջիկ իմացել են, որ իրենք հանդիպում են նույն տղամարդու հետ, որը տարբեր անուններ է օգտագործում ու խաբեբայական պատրվակներով խոշոր գումարներ պարտքով վերցնում: Այս մասին հայտնում է South China Morning Post-ը:
Խաբեությունը բացահայտվել է, երբ աղջիկներից մեկն ուշադրություն է դարձրել, որ տղամարդը պարբերաբար զանգահարում է ուրիշ կնոջ: Վեճից հետո աղջիկը վերցրել է նրա հեռախոսն ու զանգահարել այդ հեռախոսահամարով:
Պարզվել է, որ մյուս կինը հանդիպել է նույն տղամարդու հետ, սակայն նրան այլ ազգանունով է ճանաչել և մտածել է, որ նա հանքավայր ու վարկային բիզնես ունի: Տղամարդը 200 հազար յուան (մոտ 30 հազար դոլար) է խնդրել նրանից՝ մոր բուժման համար վճարելու պատրվակով:
Կանայք համատեղ ջանքերով գտել են տղամարդու երրորդ սիրուհուն, որը, պարզվել է, նրանցից մեկի ծանոթն է: Վերջինից տղամարդը ժամանակավորապես Mercedes մակնիշի ավտոմեքենա է վերցրել:
Նշվում է, որ կանայք դիմել են իրավապահ մարմիններին ու պատմել, որ իրենք մտադիր են հանդիպել տղամարդուն՝ ավտոմեքենան վերադարձնելու պահին:
Նշված ժամին տղամարդուն սպասել են կանայք, ոստիկանությունն ու տեղական հեռուստաալիքի լրագրողները: Տղամարդը փորձել է փախչել, սակայն կանանցից մեկն ու ոստիկանը խանգարել են նրան: Արդյունքում ծեծկռտուք է սկսվել, ինչի հետևանքով 3 մարդ վնասվածքներ է ստացել: