Қазақстанда салық органдарына бизнес шоттары туралы ақпарат алу жеңілдейді

Қазақстанда салық органдары борышкердің шоттары, қалдықтары мен ақша қозғалысы туралы банктерден мәлімет сұрата алатын салық берешегінің мөлшерін едәуір төмендету ұсынылып отыр. Мұндай норма "Ашық НҚА" порталында жарияланған заң жобасында қамтылған, деп хабарлайды Tengrinews.kz тілшісі.
Қазіргі уақытта егер салық берешегі 2500 АЕК-тен асса (2026 жылы 10,8 миллион теңге) және ол пайда болған күннен бастап екі ай ішінде өтелмесе, банктер салық органының сұрауы бойынша банктік шоттардың бар-жоғы мен нөмірлері, олардағы қалдықтар мен ақша қозғалысы туралы мәліметтерді беруге міндетті.
Бұл ереже жеке кәсіпкерлерге, заңды тұлғаларға және заңды тұлғалардың құрылымдық бөлімшелеріне қолданылады.
Ұлттық экономика министрлігі әзірлеген түзетулермен бұл шекті бірден 45 АЕК-ке дейін (2026 жылы 194 625 теңге) төмендету ұсынылады. Бұл ретте берешек мерзімі туралы шарт сақталады: қарыз ол пайда болған күннен бастап екі ай бойы төленбеген болуы тиіс.
Салық органының сұрауын алғаннан кейін банк 10 жұмыс күні ішінде мәліметтерді ұсынуы тиіс. Сөз банктік шоттардың бар-жоғы мен олардың нөмірлері, шоттардағы қаражат қалдықтары мен ақша қозғалысы туралы деректер жайында болып отыр.
Шектік меже неге төмендетіледі?
ҰЭМ мәліметінше, өзгерістер 2026 жылғы 1 қаңтардан бастап қолданысқа енген салық берешегін өндіріп алудың жаңа тәртібіне байланысты.
Әзірлеушілердің айтуынша, енді шаралар қарыз көлеміне байланысты болады:

берешек 20 АЕК-тен аз болса, салық төлеушіге хабарлама жіберіліп, өсімпұл есептеледі, басқа шаралар қолданылмайды;
қарыз 20-дан 45 АЕК-ке дейін болса, хабарлама жіберіледі, өсімпұл есептеледі, банктік шоттар мен касса бойынша шығыс операциялары тоқтатылады, сондай-ақ инкассолық өкімдер қойылады;
берешек 45 АЕК-тен асса, мүлікті тізімдеу мен сатуды және дебиторлар есебінен өндіріп алуды қоса алғанда, өндіріп алудың барлық шаралары қолданылады;
берешек 27 000 АЕК-тен асса, заңда қарастырылған шарттар сақталған жағдайда, жеке кәсіпкердің немесе заңды тұлғаның лауазымды адамының Қазақстаннан тыс жерге шығуына шектеу қойылуы мүмкін.

Осыған байланысты әзірлеушілер банктік ақпаратты алу ережелерін берешекті өндіріп алудың жаңа тәртібіне сәйкес келтіруді ұсынады. Нәтижесінде салық органдары екі айдан астам уақыт өтелмеген 45 АЕК-тен жоғары қарызы бар борышкердің шоттары туралы мәліметтерді банктерден сұрата алады.Егер түзету қабылданса, ол 2027 жылдың 1 қаңтарынан бастап бастап күшіне енеді. Қазіргі уақытта өзгерістер жоба сатысында тұр.