Германски лекари: рускиот активист Верзилов најверојатно бил отруен

Германски лекари во болница во Берлин, каде се лекува рускиот активист Пјотор Верзилов, велат дека најверојатно бил отруен.


„Впечатокот и наводите кои ги имаме сега, како и оние што ги обезбедуваат колегите од Москва, укажуваат на тоа дека е многу веројатно дека станува збор за труење“, изјави доктор Каи-Уве Еккарт на денешна прес-конференција.


Неговиот колега доктор Карл Макс Ајнхауп додаде дека нема друго објаснување за тоа што Верзилов бил во таква состојба и дека нема докази дека тој страдал од долгорочна болест.


Еккарт рече дека Верзилов добива интензивна нега откако пристигнал во Берлин на 15 септември, но оти не е во животна опасност.


Докторот рече дека симптомите укажуваат на нарушување на дел од нервниот систем на Верзилов кои ги регулира внатрешните органи.


Но, супстанцијата за труењето не е утврдена. Еккарт исто така рече дека Верзилов бил добро третиран во Москва, пред да биде пренесен во Берлин.