Вељаноски му наредил на обезбедувањето да му ја чува фотелјата на 27 април

На 27 април минатата година, нешто по 18 часот, кога заврши седницата, тогашниот претседавач со собраниската седница Трајко Вељаноски му испраќа СМС на шефот на неговото обезбедување Горан Ѓошевски со содржина „кажи им да влезат двајца внатре и да не им дозволат да седнат на моето место“. Овие пораки, кои се дел од вештачењето на телефонот на Трајко Вељаноски, денеска беа претставени како докази на судењето за насилствата на 27 април. Вештачењето на мобилниот телефон на тогашниот собраниски спикер Трајко Вељаноски се однесува на СМС и вибер комуникацијата во периодот февруари – мај 2017 година. Вељаноски не е меѓу обвинетите за насилствата.


На денешното рочиште се прикажуваат СМС и вибер пораки меѓу обвинетите на „крвавиот четврток“.


Во судница се присутни сите 32 обвинети, освен обвинетиот Сашко Марковски за кого постапката беше одвоена.


Судскиот процес го води судијката Добрила Кацарска, а застапници на обвинението се Вилма Русковска и Ивана Трајчевска.