ВМРО-ДПМНЕ не се согласува со „заминувањето“ на Груевски

ВМРО-ДПМНЕ не се согласува со самото заминување на Никола Груевски, тоа не е опција дури и кога сите знаат дека се работи за политички прогон. Така се загрозуваат и другите лица кои исто така се цел на тој прогон, реагира денеска партискиот портпарол, Наум Стоилковски.


Тој изрази сомнеж дека премиерот Зоран Заев и министерот за внатрешни работи Оливер Спасовски знаеле каде е поранешниот премиер.


„Тие имајќи ги во раце неограничените ресурси на државната безбедност и под едни вакви услови сакаат и уште сакаат лажно да прикажат дека не знаеја, или не знаат за движењето на Никола Груевски. Тоа е дилема која треба тие да ја одговорат“, рече Стоилковски.


Тој обвини дека „полициската опсада“ на седиштето на ВМРО-ДПМНЕ и претресувањето граѓани биле само „евтин политички театар“.