Татарстанда ярты ел эчендә коронавирус очракларының минималь саны ачыкланды

Татарстанда агымдагы елның 13 гыйнварыннан башлап коронавирусның минималь саны теркәлде. Узган тәүлектә 108 очрак ачыкланган (анна алда 110 очрак булган иде). Бу хакта стопкоронавирус.рф. сайтында хәбәр ителә.

Хастаханәгә салу таләп ителгән пациентлар саны да кимегән: аннан алда 38 кешене хастаханәгә салсалар, соңгы тәүлектә 27 кешене хастаханәгә алып киткәннәр.

Пандемия башланганнан бирле, республикада коронавирусның 150 755 очрагы ачыкланган. Татарстанда яшәүче 146 049 кеше дәваланып беткән, узган тәүлектә 74 пациент терелгән.

Бер көн эчендә республикада ковидтан вафат булучылар теркәлмәгән. Шулай итеп, республикада коронавирустан вафат булучыларның гомуми саны 1995кә җитте.

Росстат мәгълүматларына караганда, теркәлгән һәм теркәлмәгән үлем очраклары арасындагы аерма Россиянең күпчелек субъектларында күзәтелә.

• Алдарак «Татар-информ» Татарстанда битлек кию режимының бетерелүе турында хәбәр иткән иде.