Миңнеханов Таҗикстан илчесе белән Россиядә эшлекле элемтәләр урнаштыру турында сөйләште
Бүген Татарстан Рәисе Рөстәм Миңнеханов Таҗикстанның Россиядәге Гадәттән тыш һәм Тулы вәкаләтле илчесе Гөлмахмадзодо Давлатшох Курбонали белән очрашты. Бу хакта республика җитәкчесенең матбугат хезмәте хәбәр итә.
Әңгәмә Рөстәм Миңнехановның Татарстан Республикасы Хөкүмәте йортындагы эш кабинетында узды. Яклар хезмәттәшлекне алга таба ныгыту һәм Россия-Таҗикстан мөнәсәбәтләре кысаларында яңа эшлекле элемтәләр урнаштыру турында сөйләште.
Моңа кадәр республикага сәфәре барышында дипломат Казан федераль университетында булды. КФУ президенты Рияз Минзарипов белән сөйләшү барышында белгечләр әзерләү, стажировкалар уздыру һәм Таҗикстан гражданнары өчен квоталарны арттыру мәсьәләләре хакында фикер алыштылар.
Моннан тыш, яшәү шартларын да кертеп, таҗик студентларын Казан университетында укыту мәсьәләсенә дә кагылдылар. Илче шулай ук студентлар, Таҗикстанның Татарстандагы мәдәни берләшмәләре һәм яшьләр вәкилләре белән дә очрашты.