მთიან ყარაბაღში გადადგნენ დე ფაქტო მთავრობის მეთაური და ძალოვანი უწყებების ხელმძღვანელები
მთიანი ყარაბაღის თვითგამოცხადებულ რესპუბლიკაში გადადგნენ მთავრობის მეთაური, სახელმწიფო მინისტრი არაიკ არუთიუნიანი, ისევე როგორც ეროვნული უსაფრთხოების სამსახურის უფროსი, მისი მოადგილე და როგორც პოლიციის უფროსი. ბოლო დღეებში ყარაბაღის დედაქალაქ სტეპანაკერტში ტარდებოდა საპროტესტო აქციები, რომლებიც მოჰყვა ინციდენტს უშიშროების სამსახურის თანამშრომლების მონაწილეობით. დემონსტრანტები, რომლებთან მოლაპარაკებასაც არუთიუნიანი აწარმოებდა, მოითხოვდნენ ძალოვანი სტრუქტურების ხელმძღვანელთა გადადგომას. 2017 წელს ჩატარებული რეფერენდუმის შემდეგ, არაღიარებული რესპუბლიკის მმართველობა ნახევრადსაპრეზიდენტოდან საპრეზიდენტოდ გადაკეთდა და გაუქმდა პრემიერ-მინისტრის პოსტი. სახელმწიფო მინისტრს ევალება მინისტრთა კაბინეტის ხელმძღვანელობა.