غني: د پوهنتونونو او ښوونځیو فضا باید مناسبه او له تعصبه پاکه وي

افغان ولسمشر د لوړو زده‎کړو د مؤسسو او د ښوونځیو له استادانو وغوښتل چې د محصلانو او زده‎کونکو په تېره بیا د نجونو زده‎کونکو ښوونې او روزنې ته زیاته پاملرنه وکړي.


د ولسمشر په وینا دا مسئله د نجونو په ژوند کې ستر بدلون رامنځته کولای شي.


اشرف غني چې پرون چهارشنبه‎یې «۱۳۹۷ کال د غبرګولي ۰۲» په ارګ کې د یو شمېر پوهنتونونو او د ښوونځیو استادان او مسؤلین د روژه ماتي لپاره وربللي وو، دغه‌راز غوښتنه وکړه چې د افغانستان د پوهنتونونو او ښوونځیو فضا باید مناسبه او له تعصبه پاکه وي.


ولسمشر په دې کتنه کې بیا په دې ټینګار وکړ چې د استادانو او ښوونکو د هستوګنې مسئله ډېره مهمه بولي او پر هغې ډېر غور کېږي.