Новости за 31.07.2016

ბრიტანეთს საქართველოში რამდენიმე კვირაში ახალი ელჩი ეყოლება. 24 აგვისტოს მოქმედ ელჩს ვადა ეწურება, რის გამოც ალექსანდრა ჰოლ ჰოლი საქართველოს დატოვებს. ბრიტანელი დიპლომატი საქართველოში ოჯახთან ერთად 3 წელია ცხოვრობს.

საღამოს 06:00 საათის შემდეგ მარნეულში მუნიციპალური ტრანსპორტი აღარ დადის. მარნეულის ცენტრიდან სოფლებში წასვლა კერძო მიკროავტობუსებითაც შეიძლება, მაგრამ გვიანობამდე არც ეს ტრანსპორტი მოძრაობს.

თერჯოლა საარჩევნოდ ადმინისტრაციული რესურსის ზრდის ის ერთ-ერთი მაგალითია, სადაც აიპ-ებში დასაქმებულთა რაოდენობა 144-ით გაიზარდა, დაფინანსება კი 1.2 მილიონით და 7.5 მილიონს გადასცდა, რაც მთელი რაიონის ბიუჯეტის მესამედია.

აზერბაიჯანული წარმოშობის საქართველოს მოქალაქე, ქამრან მამედოვი სექტემბერში სასამართლოს ელოდება, სადაც გაირკვევა რამდენად სამართლიანად უთხრეს უარი სწავლის დაფინანსებაზე და შეეძლოთ თუ არა მისთვის 0 ქულის დაწერა. მამედოვი 0 ქულით შეფასებას ეთნიკური ნიშნით დისკრიმინაციად ხსნის. 

გორის შემდეგ საბჭოთა კავშირის გერბი და დროშა ბათუმში გამოჩნდა. შავი ზღვისპირა ქალაქის ერთ-ერთ საცეკვაო დარბაზში სახალხო მოძრაობა სოციალისტური საქართველო დაფუძნდა. 

გაერთიანებული შტაბის ყოფილი უფროსი, გენერალი გიგი კალანდაძე პოსტსკრიპტუმს სკანდალურ ინტერვიუს აძლევს. კალანდაძის მტკიცებით, აგვისტოს ომის შემდეგ საქართველოს ტერიტორიაზე აშენებული საიდუმლო სამხედრო ობიექტების კოორდინატები და მთელი ინფორმაცია, მინდია ჯანელიძის მინისტრობის დროს, სხვა ქვეყნის სპეცსამსახურების ხელში აღმოჩნდა.

სპეცოპერაცია ტეხასის ქალაქ ოსტინში ამ დრომდე გრძელდება. სამართალდამცველები ბოროტმოქმედს ეძებენ, რომელმაც ქალაქის ცენტრში ერთ-ერთ ბართან გამვლელებს ცეცხლი გაუხსნა. თავდასხმის შედეგად დაიღუპა ერთი ადამიანი, სამი დაჭრილი კი საავადმყოფოშია გადაყვანილი.

არქეოლოგიური გათხრების დროს თელავში, სპეციალისტებმა, გვირაბების კომპლექსს მიაკვლიეს. აგურებით მოპირკეთებულ შესასვლელს, სადაც რამდენიმე მეტრზე წყალი დგას, სპეციალისტები შეისწავლიან.

რუსთაველის თეატრში ქიმიის საერთაშორისო ოლიმპიადის დახურვის ცერემონიალი გაიმართა. ღონისძიებას საქართველოს პრემიერი და განათლებისა და მეცნიერების მინისტრი დაესწრნენ. ქიმიის საერთაშორისო ოლიმპიადაში მსოფლიოს 75 ქვეყნის 300 მოსწავლე მონაწილეობდა. ოლიმპიადაში გამარჯვებულებს დღესვე ოქროს, ვერცხლისა და ბრინ​ჯაოს მედლები გადაეცათ. ეს ქიმიის უკვე 48-ე საერთაშორისო ოლიმპიადა იყო და ის საქართველოში პირველად ჩატარდა.

გრანდიოზული შოუსთვის სამზადისი მიმდინარეობს ამ წუთებში დედაქალაქის ცენტრში. ღონისძიება ახალი სასტუმროს The Biltmore Hotel Tbilisi​-ს გახსნას უკავშირდება.

ქართულმა ოცნებამ ცოტა ხნის წინ შიდა ქართლში მაჟორიტარი დეპუტატობის კანდიდატები წარადგინა. პრეზენტაცია გორის ცენტრში გაიმართა.

პოლიტიკური პლატფორმა ახალი საქართველო ქუთაისის 47-ე ოლქში მაჟორიტარი კანდიდატის გამოსავლენად შიდა პარტიულ არჩევნებს ატარებს. ამომრჩეველს საშუალება აქვს პირდაპირი გზით მიიღოს მონაწილეობა მაჟორიტარი დეპუტატობის კანდიდატის შერჩევის პროცესში. 

მმართველ გუნდში მინისტრთა კაბინეტში საკადრო ცვლილებებზე საუბრობენ. თინა ხიდაშელსა და პაატა ზაქარეიშვილს უფლებამოსილება ოფიციალურად ხვალ შეუწყდებათ. მათ შემცვლელებთან დაკავშირებით კონსულტაციები ამ დრომდე მიმდინარეობს.

ისლამური სახელმწიფოს მორიგი თავდასხმების სერია ერაყში - ტერორისტების სამიზნე ქალაქ კირკუკში მდებარე ენერგო ობიექტები გახდა. ISIS-ის მებრძოლები ნავთობსაცავის ტერიტორიაზე მანქანით შეიჭრნენ და რამდენიმე რეზერვუარი ააფეთქეს.

სასტუმრო ბილთმორ თბილისის გახსნის ცერემონიასთან დაკავშირებით დედაქალაქში დღეს ტრანსპორტის მოძრაობა იზღუდება.

ლეიბორისტული პარტიის ლიდერმა ყვარელშიწინასაარჩევნო შეხვედრა  გამართა. შალვა ნათელაშვილმა ამომრჩეველს პარტიის პროგრამა გააცნო.

ერევანში ვითარება ისევ დაიძაბა. პოლიციის საგუშაგოსთან, სადაც შეიარაღებული აქტივისტები იმყოფებიან, სროლისა და აფეთქებების ხმა ისმის. დეტალებს ოფიციალური პირები არ ახმაურებენ. ტერიტორიაზე სპეცრაზმია მობილიზებული, ძალოვანებს კი გაუფრთხილებლად სროლის უფლება აქვთ.

ხმაური იყო ცოტა ხნის წინ ქობულეთში. პატიმრობაში მყოფი რევაზ კარალიძის ოჯახის წევრებმა და ახლობლებმა ცენტრალური მაგისტრალის გადაკეტვა სცადეს. სამართალდამცავებმა აქციის მონაწილეებს გზის გადაკეტვის უფლება არ მისცეს, რასაც ხმაური და დაპირისპირება მოჰყვა. 

ამ წუთებში ტეხასის ქალაქ ოსტინში სპეცოპერაცია მიმდინარეობს. სამართალდამცველები ბოროტმოქმედს ეძებენ, რომელმაც რამდენიმე საათის წინ გამვლელებს ცეცხლი გაუხსნა.

ველოსიპედებით მსვლელობა გაიმართა დღეს თბილისში. ერთიანი ნაციონალური მოძრაობის ვაკის მაჟორიტარი დეპუტატობის კანდიდატმა, ელენე ხოშტარიამ მოხალისეებთან ერთად მსვლელობა კუს ტბის ასახვევიდან დაიწყო და თბილისის სახელმწიფო უნივერსიტეტის პირველ კორპუსთან დაასრულა.

ერთიანი ნაციონალური მოძრაობის ლიდერებმა დავით ბაქრაძემ, ლევან ვარშალომიძემ და საარჩევნო შტაბის უფროსმა ნიკა მელიამ ხელვაჩაურში მაჟორიტარობის კანდიდატები წარადგინეს.

ამ წუთებში თბილისშიველოსიპედებით მსვლელობა იწყება. ერთიანი ნაციონალური მოძრაობის ვაკის მაჟორიტარი დეპუტატობის კანდიდატი, ელენე ხოშტარია და მოხალისეები კუს ტბის ასახვევთან იკრიბებიან.

ხანგრძლივი მოლოდინის შემდეგ ჰარი პოტერის ახალი წიგნი გაყიდვაში გამოვიდა. ჯოან როულინგის ახალი ნამუშევარი სახელწოდებით ჰარი პოტერი და დაწყევლილი ბავშვი ჯერ კიდევ გაყიდვაში გამოსვლამდე გახდა ბესტსელერი. შეერთებულ შტატებსა და ბრიტანეთში პირველი ტირაჟი წინასწარ გაიყიდა.

თბილისის მერს დავით ნარმანიას იმედი აქვს, რომ საკრებულოს უმრავლესობა მხარს დაუჭერს, მის მიერ თბილისის საქალაქო სამსახურის ხელმძღვანელების ადგილზე დასახელებულ კანდიდატებს. 

ამერიკელმა ექსტრემალმა რეკორდული ნახტომი განახორციელა. ლიუკ აიკინსი 7 ათას 600 მეტრის სიმაღლიდან პარაშუტის გარეშე გადმოხტა და გადარჩა. თვითმფრინავიდან გადმოხტომის შემდეგ 42 წლის აიკინსმა ორი წუთი იფრინა, რის შემდეგადაც სპეციალურად დამონტაჟებულ ბადეზე დაეშვა.