Новости за 11.04.2024

Орусияда “Крокус-ситидеги” кандуу кол салууга байланыштуу камалган тажикстандыктардын саны ондон ашты. Бул теракттан көп өтпөй кандуу калабаны даярдаган деген шек менен Тажикстандын жана Кыргызстандын бирден жараны Түркияда кармалганы белгилүү болду. Италияда дагы бир тажик жараны экстремизмге шектелип колго түштү. Борбор азиялыктар эмне үчүн террордук топтордун торуна түшүүдө? Кыргызстан мындай кырдаалда эмнеге көңүл бурушу керек? "Биз жана дүйнө" берүүсүндө жооп издедик.

11-апрелде Кыргызстанда жана дүйнөдө эмне болду? “Азаттык” күндүн башкы жаңылыктарын тизмектейт.

Казакстанда селден улам 100 миңдей киши эвакуацияланды. Өлкө президенти Касым-Жомарт Токаев кырдаалды «болуп көрбөгөндөй жаратылыш кырсыгы» деп атаган. Бишкек жылуулук электр борборундагы кырсыкты изилдеген комиссия энергетика министри Таалайбек Ибраевге сөгүш берүүнү сунуштады.

11-апрелде Бишкектин четинде оор жүк ташуучу жана атайын техниканын айдоочулары нааразылык акциясына чыкты. Алар Бишкек мэриясынын оор жүк ташуучу автоунаалардын шаар ичинде жүрүшүнө киргизген чектөөсүнө да нааразы болуп, иш таштады.

Бишкек шаардык соту Талас шайлоо округундагы шайлоонун жыйынтыгын жокко чыгарган чечимди күчүндө калтырды. Бул округдан шайланып келген парламент депутаты Бактыбек Чойбеков Жогорку Сотко апелляциялык арыз берери белгилүү болду.